قطر کے شہریوں کو ویزا حاصل کیے بغیر امریکہ میں داخل ہونے کی اجازت مل گئی ہے۔
قطر یہ درجہ حاصل کرنے والا خلیج کا پہلا اور مسلم دنیا کو دوسرا ملک بن گیا ہے۔
اس سے قبل مسلم دنیا میں یہ درجہ صرف ایک چھوٹے سے ملک برونائی کو حاصل تھا۔
امریکہ کے محکمہ خارجہ اور ہوم لینڈ سیکیورٹی نے ایک مشترکہ اعلان میں کہا ہے کہ قطر ویزا سے استثنیٰ کی سخت شرائط اور تقاضوں پر پورا اترتا ہے۔
بیان میں مزید کہا گیا ہے کہ قطر امریکہ کا ایک غیر معمولی شراکت دار ہے اور گزشتہ چند برسوں کے دوران ہمارے اسٹریٹجک تعلقات مزید مضبوط ہوئے ہیں۔
کسی ملک کے لیے امریکی ویزے سے استثنیٰ پروگرام میں شامل ہونے کے لیے ضروری ہے کہ اس ملک کے لیے امریکی ویزے سے انکار کی شرح کم ہو، اس ملک کے شہریوں کی امریکہ میں ویزے میں دی گئی معیاد سے زائد قیام کی شرح کم ہو اور وہ ملک بھی امریکہ کے شہریوں کو اپنے ہاں سفر کی ویزا فری سہولت فراہم کرتا ہو۔
قطر میں پہلے ہی سے امریکی شہریوں کو 30 یوم تک کے لیے ویزے کے بغیر داخلے کی اجازت ہے۔
قطر اب یکم اکتوبر سے امریکی شہریوں کے لیے قیام کی مدت 30 دن سے بڑھا کر 90 روز کر رہا ہے۔
