لندن کے ایک اسکول کے باہر تیزاب کے ایک مشتبہ حملے میں ایک کم عمر لڑکے اور لڑکی سمیت تین افراد زخمی ہو گئے ہیں۔
لندن پولیس کے مطابق یہ واقعہ پیر کی دوپہر کو پیش آیا جب اسکول طلبہ اور ایک اسٹاف ممبر پر ’مادہ‘ پھینکا گیا۔
لندن پولیس نے اس حوالے سے منگل کو کہا کہ ’استعمال ہونے والے مادے کا تجزیہ کیا جا رہا ہے، اور بظاہر یہ مادہ تیزاب معلوم ہوتا ہے۔‘
پولیس کے بیان میں مزید بتایا گیا ہے کہ ’واقعے میں میں 14 برس کی ایک لڑکی کو شدید زخم آئے جبکہ 16 سال کے لڑکے کے زخم شدید نوعیت کے نہیں ہیں، تاہم اسے بھی اسپتال میں داخل کرا دیا گیا ہے۔‘
لندن پولیس کے مطابق ‘یہ واقعہ مغربی لندن میں ویسٹ منسٹر اکیڈمی اسکول کے باہر پیش آیا، اور ملزم کی شناخت اور اُس کی گرفتاری کے لیے تحقیقات تیزی سے جاری ہیں۔‘
اسکول کی پرنسپل نمیرہ انوار کا کہنا ہے کہ ’اس افسوس ناک واقعے میں ایک طالب علم، ایک ٹیچر اور عام شہری زخمی ہوئے ہیں۔‘
انہوں نے بتایا کہ ’یہ واقعہ سڑک کے کنارے اس وقت پیش آیا جب طلبہ اور اسٹاف اسکول کی عمارت سے باہر نکل رہے تھے۔‘
اس حوالے سے سکول کی پرنسپل نے مزید کہا کہ ’اس واقعے میں تیزاب سے ملتا جُلتا مادہ استعمال کیا گیا ہے۔‘
