ترکمانستان میں زرداری اور پوتن کی ملاقات، تعلقات مضبوط بنانے کا عہد

پاکستان کے صدر آصف علی زرداری نے ترکمانستان کے دارالحکومت اشک آباد میں ایک بین الاقوامی فورم کے موقع پر روسی صدر ولادی میر پوتن سے ملاقات کی، جہاں انہوں نے دوطرفہ تعلقات کو مزید مضبوط بنانے کا عہد کیا۔

ترکمانستان کے زیر اہتمام منعقدہ یہ تقریب 18ویں صدی کے ترکمن مفکر، شاعر اور فلسفی میگتیمگلی فراگی کے 300ویں یوم پیدائش کے موقعے پر منائی جاتی ہے۔

یہ بین الاقوامی اجتماع اس لحاظ سے اہم سمجھا جاتا ہے کیونکہ یہ امن، ترقی اور ثقافتی تعاون پر تبادلہ خیال کے لیے مختلف علاقائی ممالک کی اہم شخصیات کو اکٹھا کرتا ہے۔

صدر آصف علی زرداری نے نائب وزیراعظم اسحاق ڈار کے ہمراہ فورم کے دوران روسی صدر ولادی میر پوتن سے بھی بات چیت کی۔

پاکستانی اور روسی صدور کی ملاقات میں دو طرفہ تعلقات کو مزید مضبوط بنانے پر زور دیا گیا اوردونوں رہنماؤں نے ایک دوسرے کے لیے نیک خواہشات کا اظہار بھی کیا۔

اس سے قبل پاکستانی صدر نے فورم سے خطاب کرتے ہوئے علاقائی تعاون بالخصوص ثقافتی اور اقتصادی ترقی کی اہمیت پر زور دیا۔

انہوں نے پاکستان اور ترکمانستان کے درمیان دیرینہ تعلقات پر بھی روشنی ڈالی اور کہا کہ یہ مشترکہ تاریخ اور اقدار پر قائم ہے۔ ساتھ ہی انہوں نے اس امید کا اظہار کیا کہ بات چیت خطے میں ثقافتی تعاون کو مضبوط بنانے کا باعث بنے گی۔