فلسطینی تنظیم حماس نےتحریک کے رہنما یحییٰ سنوار کی موت کی تصدیق کرتے ہوئے کہا کہ ’جدوجہد کو بھرپور طریقے سے جاری رکھیں گے۔‘
قطر میں حماس کے عہدے دار خلیل الحیہ نے ایک بیان میں کہا کہ ان کے قائد یحییٰ السنوار اور تحریک کے دیگر قائدین و رہنماؤں کی شہادت ہماری تحریک اور مزاحمت کو صرف مزید طاقت، استقامت اور عزم فراہم کرے گی۔‘
انہوں نے کہا کہ ہم اُن کے نقش قدم پر چلتے ہوئے اپنی جدوجہد کو بھرپور طریقے سے جاری رکھیں گے۔
الحیہ نے اپنے بیان میں کہا کہ حماس قیدیوں کو غزہ میں جنگ کے ختم ہونے تک رہا نہیں کرے گا۔
اس سے قبل اسرائیلی فوج نے حماس رہنما کی موت کے حوالے سے دعویٰ کیا تھا۔
اسرائیلی وزیر اعظم بن یامین نتن یاہو نے یحییٰ سنوار کے قتل کو ایک بڑی کامیابی قرار دیا ہے لیکن متنبہ کیا ہے کہ یہ تنازع اس وقت تک ختم نہیں ہوگا جب تک حماس کے زیر حراست تمام قیدیوں کا بازیاب نہیں کروا لیا جاتا۔
امریکی صدر جو بائیڈن سمیت مغربی رہنماؤں نے مشورہ دیا ہے کہ سنوار کی موت غزہ تنازع کے خاتمے کا راستہ کھول سکتی ہے۔
انہوں نے امید ظاہر کی کہ اس سے اسرائیلی قیدیوں کی رہائی میں مدد ملے گی۔
