امریکی وزیر خارجہ انٹونی بلنکن پیر کو مشرق وسطیٰ کے لیے روانہ ہو رہے ہیں جہاں وہ حماس کے رہنما یحییٰ سنوار کی ہلاکت کے بعد غزہ میں جنگ بندی کے لیے مذاکرات شروع کرنے پر زور دیں گے۔
امریکی محکمہ خارجہ نے بتایا ہے کہ انٹونی بلنکن کا غزہ میں جنگ کے بعد مشرق وسطیٰ کا یہ 11 واں دورہ ہے۔
امریکی محکمہ خارجہ نے اپنے بیان میں کہا ہے کہ انٹونی بلنکن علاقائی رہنماؤں کے ساتھ غزہ جنگ کے خاتمے کی اہمیت، تنازعات کے بعد فلسطینی خطے کے لیے منصوبوں اور اسرائیل-حزب اللہ تنازع کے سفارتی حل تک پہنچنے کے طریقوں پر بات کریں گے۔
محکمہ خارجہ نے کہا کہ انٹونی بلنکن کے دورے کا آغاز اسرائیل سے ہوگا مگر اس کے بعد کی منزل کے بارے میں وضاحت نہیں کی گئی۔
محکمہ خارجہ نے کہا کہ وزیر خارجہ غزہ میں جنگ ختم کرنے، تمام اسرائیلی یرغمالیوں کی رہائی کو یقینی بنانے اور فلسطینی عوام کی تکالیف کو کم کرنے کی اہمیت پر بھی بات کریں گے۔
امریکی محکمہ خارجہ کے مطابق انٹونی بلنکن دورہ مشرق وسطیٰ کے دوران اس بات پر بھی زور دیں گے کہ اضافی خوراک، ادویات اور دیگر انسانی امداد غزہ کے شہریوں تک پہنچائی جانی چاہییں۔
حماس کی جانب سے 7 اکتوبر 2023 کے حملے میں تقریباً 1200 افراد مارے گئے تھے جبکہ دیگر 253 اسرائیلیوں کو یرغمال بنا کر غزہ لے جایا گیا۔
غزہ کے محکمہ صحت کے حکام کا کہنا ہے کہ اسرائیل کے حملوں میں اب تک 42,ہزار 500 سے زیادہ فلسطینی ہلاک ہو چکے ہیں
