رواں برس جولائی کے 2 روز مسلسل تاریخ کے گرم ترین دن ریکارڈ کیے گئے۔
یورپی یونین مانیٹر نگ ایجنسی کے اعداد و شمار کے مطابق رواں برس 21 اور 22 جولائی تاریخ کے گرم ترین دن ریکارڈ کیے گئے۔
کوپرنیکس کلائمٹ چینج سروس کے مطابق 22 جولائی کو عالمی سطح پر اوسط درجہ حرارت 17.15 ڈگری سینٹی گریڈ رہا جبکہ 21 جولائی کو یہ درجہ حرارت 17.09 ڈگری سینٹی گریڈ ریکارڈ ہوا۔
کلائمیٹ مانیٹر کے مطابق دنیا بھر میں 1940 سے رکھے گئے ریکارڈ میں 21 جولائی اب تک کا گرم ترین دن تھا تاہم 22 جولائی نے اسے پیچھے چھوڑ دیا، اس طرح یہ 2 دن لگاتار تاریخ کے گرم ترین دن رہے۔
آخری بار 4 دن تک لگاتار گرم ترین دن رہنے کا ریکارڈ 2023 کے اوائل میں بنا تھا جبکہ اس سے پہلے اگست 2016 میں بھی گرم ترین دن ریکارڈ کیا جاچکا ہے۔
ماہرین کا کہنا ہے کہ دنیا بھر میں گرم ہوتی آب و ہوا کی وجہ سے مستقبل میں گرمی کے نئے ریکارڈ بنیں گے۔
