یورپی یونین نے ڈیجیٹل قانون کے تحت پہلی بار بڑے پیمانے پر ایپل، گوگل اور میٹا کے خلاف تحقیقات شروع کردیں۔
یورپی یونین کے تاریخی ڈیجیٹل مارکیٹس ایکٹ کے تحت مارکیٹ ’گیٹ کیپر‘ کے طور پر نامزد چھ کمپنیوں میں ایمیزون، ٹک ٹاک کے مالک بائٹ ڈانس اور مائیکروسافٹ شامل ہیں۔
یورپی یونین کے اینٹی ٹرسٹ ریگولیٹر یورپی کمیشن نے تحقیقات کا اعلان کرتے ہوئے ایک بیان میں کہا ہے کہ اسے شبہ ہے کہ کمپنیوں نے اب تک جو اقدامات کیے ہیں وہ ’مؤثر تعمیل سے کم ہیں۔‘
یورپی یونین کے انٹرنل مارکیٹ کمشنر تھیری بریٹن نے کہا کہ ہمیں یقین نہیں ہے کہ الفابیٹ، ایپل اور میٹا کے حل یورپی شہریوں اور کاروباری اداروں کے لئے منصفانہ اور زیادہ اوپن ڈیجیٹل جگہ کے لئے اپنی ذمہ داریوں کا احترام کرتے ہیں۔
نئے قوانین کے تحت کمیشن کسی کمپنی کے مجموعی عالمی ٹرن اوور کا 10 فیصد تک جرمانہ عائد کر سکتا ہے، اور اسے 20 فیصد تک بڑھایا بھی جاسکتا ہے، جب کہ انتہائی حالات میں، یورپی یونین کمپنیوں کو توڑنے کا حکم دے سکتا ہے۔
تحقیقات کی توجہ اس بات پر مرکوز ہے کہ آیا الفابیٹ کا گوگل پلے اور ایپل کا ایپ اسٹور ایپ ڈویلپرز کو ان ایپ مارکیٹوں سے باہر صارفین کو مفت آفرز دکھانے کی اجازت دے رہے ہیں یا نہیں۔
کمیشن کو خدشہ ہے کہ دونوں کمپنیوں نے جو اقدامات اٹھائے ہیں وہ مکمل طور پر مطابقت نہیں رکھتے کیونکہ وہ ”مختلف پابندیاں اور حدود“ عائد کرتے ہیں۔