ملائیشیا میں پولیس کے مطابق ہفتے کو ایک سپر اسٹور پر لوگوں نے پیٹرول بم (مولوٹوف کاک ٹیل بم) سے حملہ کیا۔
پولیس کے مطابق حملے کے باعث اسٹور کے سامنے رکھی کچھ اشیا جل گئیں لیکن آگ پر فوری طور پر قابو پالیا گیا تھا۔
کوانتان پولیس کے سربراہ وان محمد زہری وان بسو نے بتایا کہ ہفتے کو مشرقی ریاست پہانگ کے ضلع کوانتان میں کے کے سپر مارٹ پر پیٹرول بم سے حملہ کیا گیا۔حملے کا تعلق توہین آمیز موزوں کی فروخت سے معلوم ہوتا ہے لیکن ہم ابھی بھی تفتیش کر رہے ہیں۔
منگل کو پیراک ریاست میں ایک اور کے کے سپرمارٹ پر پیٹرول بم پھینکے جانے کے بعد یہ اس طرح کا دوسرا واقعہ تھا۔
سوشل میڈیا پر ’کے کے سپر مارٹ اسٹور‘ پر فروخت ہونے والے موزوں کی تصاویر نے مسلمانوں میں غم و غصے لہر دوڑا دی تھی۔
مارٹ پر ایسے موزے فروخت کرکے مذہبی جذبات کو مجروح کرنے کا الزام ہے، جن پر لفظ ’اللہ‘ درج تھا۔
سرکاری خبر رساں ایجنسی برناما کی رپورٹ کے مطابق سپر مارٹ کے بانی اور چیئرمین چائی کیکان، ان کی اہلیہ اور کمپنی کی ڈائریکٹر لوہ سیو موئی کے ساتھ ساتھ ان کے سپلائر کے تین نمائندوں پر مذہبی جذبات کو مجروح کرنے کے الزام میں فرد جرم عائد کردی گئی ہے۔