بھارت کے زیر تسلط کشمیر میں اسکول کے بچوں سے بھری کشتی کو حادثہ، 6 ہلاک

بھارت کے زیر تسلط کشمیر کے شہر سری نگر کے گنڈبل علاقے میں دریائے جہلم میں اسکول کے بچوں سے بھری کشتی ڈوب گئی۔ افسوسناک حادثے میں 4 بچوں سمیت 6 افراد ڈوب کر جاں بحق ہوگئے جب کہ 12 لوگوں کو بچا لیا گیا۔

کشتی بٹوارہ جا رہی تھی جس میں بچے اور مقامی لوگ سوار تھے، لیکن بی بی کینٹ آرمی ہیڈ کوارٹر کے قریب حادثے کا شکار ہو گئی۔

مقامی ڈیزاسٹر مینجمنٹ ڈیپارٹمنٹ کی طرف سے بتایا گیا کہ بھارتی فوج کی ٹیم کو ریسکیو اور ریلیف کے کاموں کے لئے تعینات کیا گیا ہے۔

بھارتی فوج کے لیفٹیننٹ گورنر منوج سنہا نے بتایا کہ میرین کمانڈو (MARCOS) ٹیموں کو بھی الرٹ کر دیا گیا ہے۔

خیال رہے کہ جموں و کشمیر میں گزشتہ چند دنوں سے جاری بارش کے باعث جہلم سمیت تمام دریا اور ندی نالوں میں طغیانی ہے۔ اس کے پیش نظر انتظامیہ نے لوگوں سے دریاؤں سے دور رہنے کی اپیل کی ہے۔