صومالیہ کے دارالحکومت موغادیشو کے مشہور ساحل میں قائم ریسٹورنٹ پر دھماکے سے 37 شہری ہلاک اور 212 زخمی ہوگئے۔
رات گئے الشباب کے مسلح افراد نے ساحل سمندر پر موجود لوگوں پر فائرنگ شروع کردی اور بعد ازاں ایک خود کش حملہ آور نے خود کو دھماکے سے اڑادیا۔
پولیس اور عینی شاہدین کے مطابق ایک خود کش بمبار نے بیچ ویو ہوٹل کے مرکزی گیٹ کے قریب خود کو دھماکے سے اڑایا جس کے بعد کچھ مسلحہ افراد نے ساحل پر موجود لوگوں پر فائرنگ شروع کردی۔
وزیر صحت علی حاجی نے انتہاپسند تنظیم الشباب پر ذمہ داری عائد کرتے ہوئے کہا کہ رات گئے ہونے والے دھماکے میں شہریوں کا جانی نقصان ہوا ہے۔
علی حاجی نے پریس کانفرنس کے دوران کہا کہ اس دھماکے میں زخمی ہونے والے 11 افراد کی حالت تشویش ناک ہے۔
انہوں نے کہا کہ حملہ آوروں میں سے ایک نے خود کو اڑا دیا جبکہ دیگر تین حملہ آوروں کو سیکیورٹی فورسز نے ہلاک کردیا اور ایک حملہ آور کو گرفتار بھی کرلیا گیا ہے۔
صومالیہ کے دارالحکومت میں ہونے والے اس خون ریز واقعے کی ذمہ داری القاعدہ سے منسلک مسلح گروپ الشباب نے قبول کرلی۔
