ایک فوجی جج نے فیصلہ دیا ہے کہ 11 ستمبر کے مبینہ ماسٹر مائنڈ خالد شیخ محمد اور دو ساتھی ملزمان کی طرف سے اقبال جرم سے متعلق معاہدے مستند ہیں۔
فیصلے نے امریکی وزیر دفاع لائیڈ آسٹن کی جانب سے معاہدوں کو منسوخ کرنے کا حکم کالعدم قرار دے دیا ہے۔
جج ائیر فورس کرنل میتھیو میک کال کے حکم کو ابھی عوامی طور پر شائع یا سرکاری طور پر اس کا اعلان نہیں کیا گیا ہے۔
اقبال جرم کے ان معاہدوں سے محمد خالد اور دو ساتھی ولید بن عطش اور مصطفیٰ الحوساوی اقبال جرم کے بدلے میں سزائے موت کے خطرے سے بچ جائیں گے۔
سرکاری پراسیکیوٹرز نے حکومت کے زیر اہتمام دفاعی وکلاء کے ساتھ معاہدوں پر گفت و شنید کی تھی اور گوانٹانا موبے کے بحری اڈے پر ملٹری کمیشن کے اعلیٰ ترین عہدیدار نے معاہدوں کی منظوری دی تھی۔
گیارہ ستمبر 2001 کے القاعدہ کے ان حملوں سے متعلق اقبال جرم سے متعلق یہ معاہدے عوامی سطح پر منظر عام پر آئے تو ریپبلکن قانون سازوں اور دیگر نے انہیں فوری طور پر تنقید کا نشانہ بنایا۔
وزیر دفاع آسٹن نے عوامی دباؤ کے پیش نظر ایک مختصر حکم جاری کرتے ہوئے معاہدوں کو منسوخ کرنے کا اعلان کیا تھا۔
پینٹاگان کے پریس سیکرٹری میجر جنرل پیٹ رائڈر نے کہا ہے جج کے فیصلے کا جائزہ لے رہے ہیں۔
