انڈین کوسٹ گارڈ نے بحیرہ انڈمان میں میانمار کی ایک مچھلیاں پکڑنے والی کشتی کو پکڑا ہے جو 5500 کلوگرام میتھم فیٹامائن لے کر جا رہی تھی۔
یہ غیرقانونی منشیات کی پکڑی جانے والی سب سے بڑی کھیپ ہے۔
انڈین وزارت دفاع نے ایک بیان میں کہا ہے کہ میانمار کے جھنڈے والا ماہی گیری والی کشتی کو پیر کو بحیرہ انڈمان میں انڈین کوسٹ گارڈ کے جاسوسی کرنے والے جہاز نے دیکھا، کیونکہ یہ ’مشتبہ طریقے سے کام کر رہی تھی۔‘
یہ کشتی جیسے ہی انڈین سمندری حدود میں داخل ہوئی حکام تحقیقات کے لیے اس میں سوار ہو گئے۔
وزارت دفاع کے بیان کے مطابق کشتی پر سوار عملے کے چھ افراد کی شناخت میانمار کے شہریوں کے طور پر ہوئی ہے۔ تلاشی کے دوران حکام کو تقریباً 5500 کلو ممنوعہ میتھم فیٹامائن ملی۔
کشتی اور اس کے عملے کو مزید تفتیش کے لیے انڈمان اور نکوبار جزائر کے دارالحکومت سری وجیا پورم میں انڈین بحریہ کے اڈے پر لے جایا گیا ہے۔
دوسری جانب انڈین کوسٹ گارڈ نے ایک بیان میں بتایا ہے کہ یہ ’بحری تاریخ میں انڈین کوسٹ گارڈ کی طرف سے پکڑی جانے والی یہ سب سے بڑی منشیات ہے، جو بین الاقوامی سمندری راستوں کے ذریعے منشیات کے بڑھتے ہوئے خطرے کو اجاگر کرتی ہے۔‘
یو این او ڈی سی نے میانمار کی ریاست شان کو خطے میں ’میتھم فیٹامائن کی پیداوار کا مرکز‘ قرار دیا ہے۔
