امریکہ میں جیٹ بلیو کی پرواز کے لینڈنگ گئیر سے دو لاشیں برآمد ہوئی ہیں۔
ایئرلائن نے بتایا کہ نیویارک سے فلوریڈا کے شہر لاڈرڈیل جانے والی پرواز کے لینڈنگ گئیر کمپارٹمنٹ میں دو شخص مردہ حالت میں پائے گئے تھے۔
فلائٹ ٹریکر ڈیٹا سے ملنے والی تفصیل کے مطابق جیٹ بلیو کی فلائٹ 1801 نیویارک کے کینیڈی ایئرپورٹ سے پیر کو شام 7 بج کر 49 منٹ پر روانہ ہوئی اور رات 11 بجکر 10 منٹ پر فورٹ لاڈرڈیل ہالی ووڈ انٹرنیشنل ایئرپورٹ پر اتری۔
ایئر لائن نے بتایا کہ لینڈنگ کے بعد طیارے کی جانچ پڑتال کی جا رہی تھی جس وقت لاشیں برآمد ہوئیں۔
ان افراد نے طیارے تک کیسے رسائی حاصل کی اس پر تحقیقات جاری ہیں۔
بروورڈ کاؤنٹی شیرف کے دفتر کا کہنا تھا کہ ’پیرامیڈیکس نے جائے وقوعہ پر دو افراد کو مردہ قرار دیا۔ یہ واضح نہیں بتایا گیا کہ دونوں افراد کتنی دیر سے لینڈنگ گیئر کے کمپارٹمنٹ میں موجود تھے۔‘
کینیڈی ایئرپورٹ کے انتظامات سنبھالنے والی نیو یارک اور نیو جرسی کی پورٹ اتھارٹی نے تاحال یہ نہیں بتایا کہ متعلقہ افراد نے طیارے تک کیسے رسائی حاصل کی ہو گی۔
ایک نیوز کانفرنس میں شیرف آفس کے پبلک انفارمیشن آفیسر کیری کوڈ نے کہا کہ دونوں افراد مردہ حالت میں پائے گئے تھے اور ان کی شناخت نہیں ہو سکی۔
انہوں نے کہا کہ بروورڈ کاؤنٹی میڈیکل ایگزامینر کا دفتر ان کی موت کی وجہ کا تعین کرنے کے لیے پوسٹ مارٹم کرے گا۔
