چین کا امریکہ کے خلاف ورلڈ ٹریڈ آرگنائزیشن میں جانے کا اعلان

امریکہ کی جانب سے ٹیرف عائد کیے جانے پر چین نے ورلڈ ٹریڈ آرگنائزیشن میں شکایت درج کرانے کا اعلان کر دیا۔

چین نے اپنے ردّعمل میں کہا ہے کہ وہ امریکی صدر ڈونلڈ ٹرمپ کی جانب سے بیجنگ پر عائد کیے گئے نئے محصولات کی سختی سے مخالفت کرتا ہے۔

ایک بیان میں چینی وزارت تجارت نے کہا ہے کہ اپنے حقوق کا دفاع کرنے کے لیے جوابی اقدامات کریں گے۔

چینی وزارت تجارت نے کہا کہ ٹیرف کا نفاذ عالمی تجارتی تنظیم کے قوانین کی سنگین خلاف ورزی ہے۔

چینی وزارت خارجہ نے کہا کہ یہ ٹیرف تعمیری نہیں ہے۔

اس سے قبل امریکی صدر ڈونلڈ ٹرمپ نے بڑے تجارتی شراکت داروں چین، کینیڈا اور میکسیکو پر نئے ٹیرف لاگو کیے تھے۔

وائٹ ہاؤس کی ایک فیکٹ شیٹ میں کہا گیا ہے کہ ’ٹیرف بحران کے خاتمے تک برقرار رہیں گے‘، تاہم اس حوالے سے تفصیلات نہیں بتائی گئیں کہ تینوں ممالک کو اس سے چھٹکارے کے لیے کون سے اقدامات کرنے کی ضرورت ہوگی۔