پاکستان کی وفاقی حکومت نے امریکہ کے ساتھ تجارتی تعلقات کے فروغ اور نئے ٹیرف کے حوالے سے مذاکرات کے لیے اعلٰی سطح کا وفد بھیجنے کا فیصلہ کیا ہے۔
بدھ کو وزیراعظم ہاؤس کے میڈیا ونگ سے جاری بیان کے مطابق وزیراعظم شہباز شریف کی ہدایت پر وفد میں معروف کاروباری شخصیات اور برآمد کنندگان (ایکسپورٹرز) بھی شامل ہوں گے۔
بیان میں مزید کہا گیا ہے کہ وفد کو وزیراعظم نے امریکہ کی جانب سے درآمدات پر لگائے گئے نئے ٹیرف پر مذاکرات کے بعد مستقبل کے لیے باہمی طور پر مفید لائحہ عمل طے کرنے کا ٹاسک سونپ دیا گیا ہے۔
جائزہ اجلاس سے خطاب میں وزیراعظم نے کہا کہ امریکہ پاکستان کے تجارتی تعلقات دہائیوں پر محیط ہیں۔ ’حکومت، امریکہ کے ساتھ تجارتی شراکت داری کو مزید مضبوط بنانے کی خواہاں ہے۔‘
وزیراعظم کو اجلاس میں امریکہ کی جانب سے لگائے گئے نئے ٹیرف پر، اسٹیئرنگ کمیٹی اور ورکنگ گروپ کی رپورٹ اور مستقبل کا مجوزہ لائحہ عمل پیش کیا گیا۔
اجلاس کو بتایا گیا کہ امریکہ میں پاکستانی سفارتخانہ مسلسل امریکی حکومت کے ساتھ رابطے میں ہے۔
وزیراعظم نے امریکہ کے ساتھ اس حوالے سے مذاکرات کے لیے وفد کی تشکیل کے دوران معروف کاروباری شخصیات اور برآمد کنندگان کی شمولیت یقینی بنانے کی ہدایت کی ہے۔
واضح رہے کہ تین اپریل کو امریکی صدر ڈونلڈ ٹرمپ نے پاکستان پر 29 فیصد ٹیرف عائد کرنے کا اعلان کیا تھا۔
