استنبول میں عدالت کے باہر دہشت گردی کی کوشش ناکام

ترکیہ کا دل کہلانے والے استنبول میں سیکیورٹی فورسز نے دہشتگرد حملہ ناکام بناتے ہوئے حملہ آوروں کو مارڈالا۔

منگل کی صبح ہونے والے اس واقعے میں چھ افراد زخمی بھی ہوئے جن میں تین پولیس افسران بھی شامل ہیں۔

ترک حکام نے حملے کا الزام بائیں بازو کے مسلح گروپ ریوولیوشنری پیپلز لبریشن پارٹی پر عائد کیا ہے۔

ترک وزیر داخلہ علی یرلیکایا نے ایکس پر کہا کہ شوٹروں نے استنبول میں کیگلیان عدالت کے قریب ایک چوکی پر فائرنگ کی ، جوابی کارروائی میں خاتون اور مرد دہشت گرد مارے گئے۔

واقعے کے بعد جائے وقوعہ سے ملنے والی فوٹیج میں عدالت کے داخلی دروازے پر پولیس کی بھاری نفری کو دکھایا گیا ہے، داخلی اور خارجی راستے بند ہیں۔ وزیر انصاف یلماز ٹنک نے کہا کہ استغاثہ نے حملے کی تحقیقات شروع کر دی ہیں۔