اسرائیل اور لبنان میں جنگ بندی معاہدے کے بعد لبنانی شہری فتح کا نشان بنا کر اپنے گھروں کو واپس لوٹ رہے ہیں۔
اسرائیل حزب اللّٰہ جنگ بندی معاہدے کے اطلاق کے ساتھ ہی ہزاروں لبنانیوں نے جنوب میں اپنے گھروں کو لوٹنا شروع کر دیا ہے۔
جنگ بندی معاہدے کے بعد بیروت کے جنوبی مضافات میں فائرنگ کر کے جشن منایا گیا، جس کی آوازیں دور دراز میں سنی گئیں، لیکن فوری طور پر جنگ بندی کی خلاف ورزی کی کوئی اطلاع موصول نہیں ہوئی ہے۔
ادھر لبنانی فوج کی جانب سے جاری کردہ بیان میں کہا گیا ہے کہ اسرائیلی فوج کے انخلاء تک دیہاتی علاقوں میں لوگ اپنے گھر واپس نہ جائیں۔
اسرائیل اور لبنان کے درمیان جنگ بندی معاہدہ گزشتہ 14 ماہ سے جاری جنگ کے خاتمے کی جانب اہم قدم سمجھا جا رہا ہے، جبکہ بیشتر افراد امید کر رہے ہیں کہ اس معاہدے کے بعد اسرائیلی حملے مستقل طور پر ختم ہو جائیں گے۔
اسرائیلی فوج نے شہریوں کو ہدایت جاری کرتے ہوئے شمالی اسرائیلی علاقوں میں فی الحال جانے سے روک دیا ہے۔
ان کا کہنا ہے کہ شمالی اسرائیل میں شہریوں کی محفوظ واپسی کے وقت سے متعلق اپ ڈیٹ کریں گے۔
