اسرائیل نے حماس کے ملٹری چیف محمد ضیف کو نشانہ بنانے کا دعویٰ کیا ہے
غزہ کی وزارتِ صحت کے مطابق ہفتے کو سیف زون قرار دیئے گئے علاقے میں اسرائیلی حملے کے نتیجے میں 71 افراد ہلاک اور 289 زخمی ہوئے ہیں۔
اسرائیلی فوج نے دعویٰ کیا ہے کہ اس نے حماس کی القسام بریگیڈ کے سربراہ محمد ضیف اور خان یونس بریگیڈ کے کمانڈر رفع سلامہ کو حملے میں نشانہ بنایا ہے۔
اسرائیلی فوج نے المواسی کیمپ کی فضا سے بنائی گئی تصاویر شائع کی ہیں جن میں دعویٰ کیا ہے کہ کیمپ میں عام شہریوں کے ساتھ عسکریت پسند بھی چھپے ہوئے ہیں۔
اسرائیلی فوج نے ایک بیان میں کہا ہے کہ حملے کا نشانہ بننے والا علاقہ درختوں، کئی عمارتوں اور مختلف شیڈز سے گھرا ہوا تھا۔
اسرائیلی فوج کے حکام نے صحافیوں کو آن لائن بریفنگ کے دوران کہا کہ جس علاقے کو نشانہ بنایا وہاں ٹینٹ موجود نہیں تھے بلکہ حماس کے زیرِ انتظام ایک آپریشن کمپاؤنڈ تھا جہاں متعدد دہشت گرد محمد ضیف کی حفاظت پر مامور تھے۔
اسرائیلی فوجی حکام کے مطابق ابھی یہ معلوم نہیں ہو سکا ہے کہ حملے کے نتیجے میں ضیف کی ہلاکت ہوئی ہے یا نہیں۔ تاہم حملے کے نتائج کی تصدیق کی جا رہی ہے۔۔
اسرائیلی فوج کے بقول محمد ضیف اور رفع سلامہ اسرائیل پر گزشتہ برس سات اکتوبر کو ہونے والے حملے کے ماسٹر مائنڈ تھے۔
واضح رہے کہ المواسی کیمپ اسرائیلی فوج کی جانب سے ہی محفوظ علاقہ قرار دیا گیا تھا جہاں فلسطینیوں کو منتقل ہونے کے کئی احکامات جاری کیے گئے تھے۔
اسرائیلی حملے میں زخمی ہونے والوں کو قریبی نصیر اسپتال منتقل کیا گیا ہے۔
اسپتال کے منتظمین کا کہنا ہے کہ بڑی تعداد میں زخمیوں کے آنے کی وجہ سے علاج کی سہولتیں ناکافی ہیں۔
