امریکی صدر ڈونلڈ ٹرمپ نے یوکرین کے لیے ہر قسم کی فوجی امداد بند کر دی ہے اور یہ اقدام پچھلے ہفتے ان کی یوکرینی صدر ولادیمیر زیلنسکی کے ساتھ تلخ کلامی کے بعد سامنے آیا ہے۔
رپورٹ کے مطابق وائٹ ہاؤس کے ایک عہدیدار نے پیر کے روز نام ظاہر نہ کرنے کی شرط پر بتایا کہ ’صدر امن پر توجہ مرکوز کرنے کے معاملے میں بالکل واضح ہیں اور ہم چاہتے ہیں کہ ہمارے شراکت دار بھی اس مقصد کے لیے پرعزم رہیں۔
عہدیدار کے مطابق یوکرین کو دی جانے والی امداد روک رہے ہیں اور جائزہ لے رہے ہیں تاکہ یہ یقینی بنایا جا سکے کہ یہ کسی حل میں معاون ثابت ہو۔
صدر ٹرمپ یوکرین میں جنگ ختم کرنے پر زور دے رہے ہیں۔ لیکن یوکرین کے صدر زیلنسکی نے خدشات کا اظہار کیا ہے کہ ٹرمپ اس تنازع کو ان شرائط پر حل کرنے کی کوشش کر رہے ہیں جو کیف کے مقابلے میں ماسکو کے زیادہ حق میں ہیں۔
صدر ٹرمپ نے پیر کو مزید واضح کیا ہے کہ اگر یوکرین اپنی بقا چاہتا ہے تو زیلنسکی کو ایک معاہدہ کرنا ہوگا۔
صدر ٹرمپ نے کہا کہ “یہ بہت جلدی کیا جا سکتا ہے۔ اب شاید کوئی شخص معاہدہ نہیں کرنا چاہتا اور اگر کوئی شخص معاہدہ نہیں کرنا چاہتا تو میرے خیال میں وہ شخص زیادہ عرصہ نہیں رہ پائے گا۔ اُس شخص کی بات زیادہ عرصے تک نہیں سنی جائے گی۔ کیوں کہ مجھے یقین ہے کہ روس معاہدہ کرنا چاہتا ہے۔ مجھے یقین ہے کہ یوکرین کے لوگ یقینی طور پر معاہدہ چاہتے ہیں۔ انہوں نے سب سے زیادہ تکلیف اٹھائی ہے۔”
اس سے قبل ایک سوشل میڈیا پوسٹ میں صدر ٹرمپ نے زیلنسکی کے اس اندازے پر کہ یوکرین میں روس کی جنگ کا خاتمہ “ابھی بہت دور ہے۔” پر تنقید کرتے ہوئے اسے “بدترین بیان” قرار دیا تھا۔
صدر ٹرمپ نے کہا کہ “امریکہ اسے زیادہ دیر برداشت نہیں کرے گا!”
جمعے کو وائٹ ہاؤس میں صدر ٹرمپ اور زیلنسکی کی ملاقات میں ہونے والی تکرار کے بعد زیلنسکی نے اپنے یورپی اتحادیوں سے بھی ملاقات کی تھی۔
