ٹیسلا کے بانی ایلون مسک اور چیٹ جی پی ٹی کے سیم آلٹمین ایک بار پھر آمنے سامنے ہیں
ٹیسلا اور اسپیس ایکس کے بانی ایلون مسک کی سربراہی میں سرمایہ کاروں کے گروپ نے چیٹ جی پی ٹی کی مالک کمپنی اوپن اے آئی کو خریدنے کے لیے تقریباً 97.4 ارب ڈالر کی پیشکش کردی ہے۔
دوسری جانب اوپن اے آئی کے سی ای او سیم آلٹمین نے مسک کے سوشل میڈیا پلیٹ فارم ایکس پر اس بولی کو فوری طور پر مسترد کرتے ہوئے کہا، ’نہیں شکریہ لیکن اگر آپ چاہیں تو ہم ٹوئٹر کو 9.74 بلین ڈالر میں خرید لیں گے۔
مسک اور آلٹ مین نے مل کر 2015 میں اوپن اے آئی کو شروع کیا تھا اور بعد میں دونوں میں اس بات پر مقابلہ تھا کہ اس کی قیادت کس کو کرنی چاہیے۔ تاہم طویل جھگڑے کے بعد ایلون مسک نے 2018 میں کمپنی کے بورڈ سے استعفیٰ دے دیا تھا۔
اوپن اے آئی کے ابتدائی سرمایہ کار اور بورڈ کے رکن مسک نے گزشتہ سال پہلے کیلیفورنیا کی ایک ریاستی عدالت میں اور بعد میں وفاقی عدالت میں اوپن اے آئی پر مقدمہ بھی دائر کیا تھا۔
مسک نے یہ الزام لگایا کہ کمپنی نے ایک غیر منافع بخش تحقیقی لیب کے طور پر اپنے مقاصد کے برعکس کام کیا ہے۔ اس کا مقصد انسانوں سے بہتر مصنوعی ذہانت کا قیام عمل میں لاتے ہوئے عوام کی بھلائی کے لیے کام کرنا تھا۔
مسک کے وکیل مارک ٹوبروف کے مطابق مسک اور سرمایہ کاری کرنے والی فرموں کا ایک کنسورشیم اوپن اے آئی کا کنٹرول سنبھالنا چاہتا ہے اور اسے ایک غیر منافع بخش ریسرچ لیب کے طور پر اپنے اصل خیراتی کام میں واپس لانا چاہتا ہے۔
ایلون مسک نے ایکس (سابقہ ٹوئٹر) کو سال 2022 میں 44 ارب ڈالر میں خریدا تھا۔
مسک کے وکیل ٹوبروف نے کہا ہے کہ مسک نے اوپن اے آئی کے قیام سے لے کر 2018 تک سٹارٹ اپ میں تقریباً 45 ملین ڈالر کی سرمایہ کاری کی تھی۔
