امریکی صدر ڈونلڈ ٹرمپ اور یوکرینی صدر زیلنسکی کے مابین کشیدگی کے درمیان یوکرینی صدر سے اظہار یکجہتی کے لیے برطانیہ میں یورپی رہنماؤں کا اجلاس ہوا۔
لندن میں منعقدہ اجلاس سے برطانوی وزیراعظم کیئر اسٹارمر نے خطاب کرتے ہوئے کہا کہ یوکرین کیلئے اچھے نتائج حاصل کرنا صرف صحیح اور غلط کا معاملہ نہیں۔ یورپ کو یوکرین کی سلامتی کیلئے دفاعی کوششیں بڑھانا ہوں گی۔
کیئر اسٹارمر نے کہا کہ اچھے نتائج تمام یورپی اقوام اور دوسرے لوگوں کی سلامتی کیلئے بھی ضروری ہیں، یورپی ممالک کو یوکرین کی سلامتی کیلئے دفاعی کوششیں بڑھانی ہوں گی، یوکرین کی سلامتی میں پورے براعظم کا استحکام ہے۔
اجلاس میں یوکرینی صدر ولودومیر زیلنسکی کے علاوہ کینیڈا، فرانس، جرمنی، اٹلی اور دیگر یورپی سربراہان سمیت نیٹو کے سیکریٹری جنرل، یورپی کمیشن اور یورپین کونسل کے صدور شریک ہوئے۔
اجلاس میں روس یوکرین جنگ خاتمے کی کوششوں، وسیع تر یورپی دفاع پر تبادلہ خیال کیا کیا گیا۔
اجلاس سے قبل اطالوی وزیراعظم جارجیا میلونی نے برطانوی وزیراعظم اسٹارمر اور یوکرینی صدر زیلنسکی سے ملاقات کی جس میں یوکرین تنازع کے حل پر بات چیت ہوئی۔
واضح رہے کہ گذشتہ روز برطانیہ نے یوکرین کو 2.8 ارب ڈالرز کا قرض دینے کا اعلان بھی کیا تھا۔
