جرمنی میں گاڑی راہگیروں پر چڑھادی، دو افراد ہلاک متعدد زخمی

جرمنی کے شہر مین ہائیم میں ایک تیز رفتار کار راہگیروں پر چڑھ دوڑی۔

پولیس کے مطابق جرمنی کے شہر مینہیم کے مرکزی علاقے میں ایک گاڑی کو ہجوم پر چڑھانے کے واقعے کے باعث دو افراد ہلاک اور متعدد زخمی ہو گئے ہیں۔

پولیس نے حملے میں ملوث مشتبہ شخص کو حراست میں لے لیا ہے۔

پولیس ترجمان نے بتایا کہ کار سوار ملزم کو گرفتار کر لیا گیا ہے جس سے تفتتیش کی جا رہی ہے تاہم ملزم کی شناخت ظاہر نہیں کی گئی۔

یہ واقعہ مقامی وقت کے مطابق دن 12 بجے جرمنی کے مغربی شہر کی پاراڈیپلاٹز مارکیٹ اسکوائر میں پیش آیا۔

تاحال یہ معلوم نہیں ہے کہ مشتبہ شخص نے ایسا کیوں کیا

خیال رہے کہ یہ واقعہ اُس وقت پیش آیا جب کارنیول سیزن کے موقع پر پریڈ کے لیے جرمنی کے رائن لینڈ سمیت تمام خطوں کے شہروں میں بڑی تعداد میں لوگ جمع ہیں۔

یاد رہے کہ جرمنی میں حالیہ ہفتوں میں ہونے والے پرتشدد حملوں کے بعد سیکیورٹی قابل تشویش ہے۔

دسمبر میں میگڈےبرگ اور گزشتہ ماہ میونخ میں بھی اسی طرز کے واقعات رونما ہوئے تھے جن میں ہلاکتیں بھی ہوئی تھیں۔

اسی طرح مئی 2024 میں بھی مین ہائیم میں چھرا گھونپنے کے واقعے کی ذمہ داری داعش نے قبول کی تھی