روس نے میٹا کے ترجمان اینڈی اسٹون کو مطلوب افراد کی فہرست میں شامل کر دیا

سرکاری خبر رساں ایجنسی ٹاس (ٹی اے ایس ایس) کا کہنا ہے کہ روس نے میٹا پلیٹ فارمز کے ترجمان اینڈی اسٹون کو غیر متعین اور نامعلوم الزامات پر مطلوب افراد کی فہرست میں شامل کر دیا ہے۔

روسی وزارتِ داخلہ نے اسٹون کے خلاف مجرمانہ تحقیقات شروع کر دی ہیں لیکن وزارت نے تفتیش یا الزامات کی تفصیلات ظاہر نہیں کیں۔

گذشتہ سال فروری میں یوکرین پر ماسکو کے حملے کے کچھ ہی دیر بعد میٹا کے اہم سوشل پلیٹ فارمز – فیس بک اور انسٹاگرام – دونوں پر روس میں پابندی لگا دی گئی تھی۔

مارچ 2022 میں روسی تحقیقاتی کمیٹی نے کہا اس نے “میٹا کے ملازمین کے غیر قانونی اقدامات” کے خلاف مجرمانہ تحقیقات شروع کر دی ہیں اور اسٹون کا ذکر کرتے ہوئے کہا کہ انہوں نے “اپنے پلیٹ فارمز پر روسی فوج کے خلاف تشدد کے مطالبات پر پابندی ختم کر دی” تھی اور اس طرح وہ انتہا پسندانہ سرگرمیوں پر اکسانے کا سبب بن رہے تھے۔