جاپان کے مختلف ساحلی علاقوں میں سیکڑوں ٹن مچھلیوں کے مرنے کا سلسلہ بڑھ گیا ہے
دسمبر کے شروع میں مختلف اقسام کی لگ بھگ 12 سو ٹن مردہ مچھلیاں جاپانی جزیرے ہوکائیدو کے ساحلی شہر ہاکوداتے میں بہہ کر پہنچ گئی تھیں۔
مردہ مچھلیوں کے باعث مقامی ماہی گیروں کو شکار کرنے میں مشکلات کا سامنا ہے اور انہیں خدشہ ہے کہ مردہ مچھلیاں سڑنے سے بحری حیات کو نقصان پہنچ سکتا ہے۔
مقامی حکام کے مطابق مچھلیوں کے مرنے کی وجہ ابھی معلوم نہیں۔ انہوں نے بتایا کہ ہم نے اس جگہ سے سمندری پانی کے نمونے کا تجزیہ کرنے کا منصوبہ بنایا ہے تاکہ مچھلیاں مرنے کی وجہ معلوم ہوسکے۔
حکام نے برطانوی میڈیا کی اس رپورٹ کو مسترد کردیا کہ فوکو شیما جوہری پلانٹ سے پانی میں چھوڑی گئی تابکاری کے نتیجے میں یہ مچھلیاں مری ہیں۔
انہوں نے کہا کہ فوکوشیما سے تابکاری کو پانی میں خارج کیے 4 ماہ سے زائد عرصہ ہوچکا ہے اور ہم نے سمندری پانی کے سروے میں کوئی غیرمعمولی چیز دریافت نہیں کی، برطانوی میڈیا کی رپورٹ کسی سائنسی ثبوت پر مبنی نہیں۔
