پاکستان کے معاشی حب کراچی میں اسٹریٹ کرمنلز بے قابو ہوگئے
لٹیروں نے کراچی کے ضلع غربی کے علاقے سرجانی ٹاؤن میں موبائل فون چھیننے میں مزاحمت پر ایک اور نوجوان کو قتل کردیا۔
سینیئر سپرنٹنڈنٹ آف پولیس (ایس ایس پی) غربی حفیظ الرحمان بگٹی کے مطابق نوجوان زوہیب افطار کیلئے ماموں کےگھر آیا ہوا تھا، موٹرسائیکل سوار ملزمان نے زوہیب سے موبائل فون چھیننے کی کوشش کی۔
ایس ایس پی نے بتایاکہ مزاحمت پرملزمان نے فائرنگ کردی جس سے ایک گولی زوہیب کے سینے پر لگی، اسے زخمی حالت میں اسپتال لے جایا جا رہا تھا کہ راستے میں دم توڑ گیا۔
ان کا کہنا تھاکہ واقعے کی جگہ سے نائن ایم ایم پستول کاخول ملاہے۔
دوسری جانب وزیر داخلہ سندھ ضیا الحسن لنجار نے ایس ایچ اوسرجانی کو فوری معطل کرنے کےاحکامات دیتے ہوئے ایس ایس پی ویسٹ سے ایس ایچ او کا سابقہ اور حالیہ ریکارڈ طلب کرلیا۔
خیال رہے کہ گزشتہ 24 گھنٹوں میں کراچی میں دوسرا نوجوان ڈاکوؤں کا نشانہ بنا ہے۔
گزشتہ روز نارتھ کراچی کی بلال کالونی میں ڈکیتوں نے مزاحمت پر نوجوان کی جان لے لی تھی۔
فائرنگ کے نتیجے میں ہلاک ہونے ولا 24 سالہ عبد الرحمان لیاری کا رہائشی تھا۔
