پشاور ہائیکورٹ نے پی ٹی آئی انٹراپارٹی الیکشن سے متعلق الیکشن کمیشن کا فیصلہ معطل کردیا

پشاور ہائیکورٹ نے پاکستان تحریک انصاف کے انٹرا پارٹی الیکشن سے متعلق الیکشن کمیشن آف پاکستان کا فیصلہ معطل کرتے ہوئے حکم امتناع جاری کر دیا۔

پشاور ہائیکورٹ کے جسٹس کامران حیات میاں خیل نے پی ٹی آئی کی درخواست پر تمام فریقین کو نوٹس جاری کرتے ہوئے جواب بھی طلب کر لیا۔

عدالتی فیصلے کے مطابق کیس کا فیصلہ ہونے تک الیکشن کمیشن کا فیصلہ معطل ہوگا۔

جسٹس کامران حیات نے ریمارکس دیئے کہ ایک سیاسی جماعت کو آپ نے انتخابات سے باہر کر دیا، اس ملک میں کتنی سیاسی جماعتیں ہیں، اور کتنے کیس الیکشن کمیشن کے پاس پڑے ہے سب کا فیصلہ کریں پھر، اس طرح اگر پیپلز پارٹی سے تیر، مسلم لیگ ن سے شیر اور جماعت اسلامی سے نشان لے لیا جائے تو پیچھے کیا رہ جاتا ہے۔