یونان میں بدترین ریل حادثے کی دوسری برسی کے موقع پر نقاب پوش نوجوانوں نے پارلیمنٹ کے باہر مظاہرہ کیا، پیٹرول بم پھینکے اور پولیس کے ساتھ جھڑپیں کیں۔
رپورٹ کے مطابق 28 فروری 2023 کو وسطی شہر لاریسا کے قریب مال بردار ٹرین اور مسافر ٹرین کے حادثے میں ہلاک ہونے والے 57 افراد کے لیے انصاف کا مطالبہ کرنے کے لیے تقریباً 2 لاکھ افراد جمع ہوئے۔
بچوں اور بزرگوں سمیت بھیڑ کا زیادہ تر حصہ اس وقت بھاگنے پر مجبور ہو گیا، جب نقاب پوش مظاہرین نے پیٹرول بم اور پتھر پھینکے جس کے جواب میں پولیس نے آنسو گیس اور دستی بم داغ دیئے۔
نوجوانوں نے کچرے کے ڈبوں میں آگ لگا دی، اور بس اسٹاپوں اور دکانوں کی کھڑکیوں میں توڑ پھوڑ شروع کردی تھی اس دوران 40 سے زیادہ مظاہرین کو گرفتار کرلیا گیا۔
ایمبولینس سروس کا کہنا ہے کہ 9 افراد کو اسپتال منتقل کیا گیا، جن میں ایک فوٹوگرافر بھی شامل ہے، جس کے سر پر دستی بم سے حملہ کیا گیا تھا، ان میں سے کئی کا پارلیمنٹ میں علاج کیا گیا۔
