آئی سی سی ورلڈکپ کے 29ویں میچ میں بھارت نے انگلش ٹیم کو چاروں شانے چت کرکے 100 رنز سے کامیابی حاصل کرلی
ٹیم انڈیا کی ورلڈکپ میں یہ مسلسل چھٹی جیت ہے۔
230 رنز کے تعاقب میں انگلینڈ کی بیٹنگ لائن ریت کی دیوار ثابت ہوئی اور وقفے وقفے سے وکٹیں گرتی رہیں۔
صرف 52 رنز کے مجموعی اسکور پر انگلینڈ کے ابتدائی 5 کھلاڑی پویلین لوٹ گئے تھے۔ اس کے بعد بھی بھارتی بولرز کے سامنے کوئی بیٹسمین ٹھہر نہیں سکا۔ اور پوری ٹیم 35 ویں اوورز میں 129 رنز پر ڈھیر ہوگئی۔
انگلینڈ کے اوپنر جونی بیرسٹو نے 14 رنز ، ڈیوڈ ملان 16، کپتان جوز بٹلر 10 جبکہ جو روٹ ، بین اسٹوکس اور مارک ووڈ کھاتہ کھولے بغیر ہی پویلین واپس چل دیئے۔
بھارت کی طرف سے محمد شامی نے 4 انگلش بلے بازوں کو پویلین کی راہ دکھائی۔جسپریت بمراہ کے حصے میں 3 تین وکٹیں آئیں۔ کلدیپ یادیو نے 2 اور رویندرا جڈیجا نے ایک وکٹ اپنے نام کی۔
