امریکی صدر ڈونلڈ ٹرمپ نے حماس کو سخت وارننگ دیتے ہوئے کہا ہے کہ اگر گروپ کے رہنما غزہ نہیں چھوڑتے اور باقی اسرائیلی یرغمالیوں کو رہا نہیں کیا جاتا تو امریکہ اسرائیل کی مدد سے حماس کو مکمل تباہ کر دے گا۔
ٹرمپ نے بدھ کے روز سوشل میڈیا پلیٹ فارم ”ٹروتھ سوشل“ پر ایک بیان میں لکھا ’تمام یرغمالیوں کو فوری رہا کرو اور جن لوگوں کو قتل کیا، ان کی لاشیں واپس کرو، ورنہ تمہارا خاتمہ یقینی ہے۔‘
ٹرمپ نے یہ بیان چھ رہا ہونے والے یرغمالیوں سے ملاقات کے بعد دیا۔
انہوں نے مزید کہ ’میں اسرائیل کو اس مشن کو مکمل کرنے کے لیے ہر چیز فراہم کر رہا ہوں، اگر تم نے میری بات نہ مانی تو حماس کا کوئی بھی رکن محفوظ نہیں رہے گا۔‘
انہوں نے اپنے بیان کو حماس کے لیے ’’آخری وارننگ‘‘ قرار دیا۔
اسرائیلی وزیر دفاع اسرائیل کاتز نے بھی اس سے ملتا جلتا بیان دیتے ہوئے کہا، ’غزہ کے دروازے بند ہو جائیں گے اور جہنم کے دروازے کھل جائیں گے۔‘
یہ دھمکیاں ایسے وقت میں سامنے آئی ہیں جب اسرائیل اور حماس کے درمیان ابتدائی جنگ بندی ختم ہو چکی ہے۔
