مکہ مکرمہ، ریاض اور مدینہ منورہ سمیت سعودی عرب کے متعدد شہروں میں موسلا دھار بارشوں کے باعث طغیانی اور سیلاب کا امکان ظاہر کیا جارہا ہے۔
سعودی عرب کے جنرل ڈائریکٹوریٹ آف سول ڈیفنس نے شہریوں کو متنبہ کیا ہے کہ ملک کے بیشتر علاقوں میں طوفانی بارشوں کا سلسلہ پیر تک جاری رہ سکتا ہے۔
سعودی پریس ایجنسی کے مطابق عوام کو ہدایت دی گئی ہے کہ وہ محفوظ مقامات پر رہیں، وادیوں اور ندی نالوں سے دور رہیں اور سیلاب زدہ علاقوں میں نہانے سے گریز کریں۔
موسمیاتی پیشگوئی کے مطابق مکہ اور ریاض میں موسلا دھار بارش متوقع ہے، جو سیلاب، ژالہ باری اور تیز ہواؤں کا سبب بن سکتی ہے۔ مدینہ، عسیر، حائل اور قصیم میں بھی شدید بارشوں کا امکان ہے، جبکہ مشرقی صوبے میں درمیانی بارشیں متوقع ہیں۔
تبوک، باحہ، جازان اور نجران میں بھی ہلکی سے درمیانی بارش ہونے کا امکان ہے۔ سول ڈیفنس نے عوام کو ہدایت کی ہے کہ وہ سرکاری ذرائع اور سوشل میڈیا کے ذریعے موسمی اپ ڈیٹس سے باخبر رہیں۔
