انڈین کرکٹ بورڈ (بی سی سی آئی) نے ٹی20 فارمیٹ کے لیے سوریا کمار یادیو کو ٹیم کا نیا کپتان نامزد کردیا ہے۔
ٹی20 ورلڈ کپ کے بعد سے ہاردک پانڈیا کو انڈین ٹیم کا کپتان بنائے جانے کی خبریں زیرگردش تھیں، تاہم اب بورڈ نے ٹیم کی قیادت سوریا کمار یادیو کو سونپ دی ہے۔
انڈیا کی جانب سے دورہ سری لنکا کے لیے سکواڈ کا اعلان کر دیا گیا ہے جس کے مطابق ٹی20 ٹیم کے کیپٹن روہت شرما کے بجائے سوریا کمار یادیو ہوں گے جبکہ او ڈی آئی میچز کی قیادت روہت شرما ہی کریں گے۔
شبمن گل ٹی20 اور او ون ڈے دونوں فارمیٹس میں نائب کپتان کے طور پر ذمہ درایاں سرانجام دیں گے۔
68 ٹی20 میچوں میں شرکت کرنے والے سوریا کمار یادیو اس سے قبل نومبر 2023 میں سینیئر کھلاڑیوں کی عدم دستیابی کے باعث آسٹریلیا اور جنوبی افریقہ کے خلاف ٹیم کی قیادت کرچکے ہیں، تاہم اب مڈل آرڈر بیٹر کو مختصر ترین فارمیٹ میں یہ ذمہ داری سونپی گئی ہے۔
انڈیا کی ٹیم جولائی اور اگست میں سری لنکا کا دورہ کرے گا جہاں دونوں ٹیموں کے درمیاں تین ایک روزہ میچز اور تین ٹی20 میچز شیڈول ہیں۔
دورہ سری لنکا کے لیے انڈین سکواڈ میں ہاردک پانڈیا، ارشدیپ سنگھ، محمد سراج اور اکشر پٹیل بھی شامل ہیں، تاہم جسپریت بمراہ سکواڈ میں شامل نہیں ہیں جبکہ وراٹ کوہلی روہت شرما اب صرف ون ڈے اور ٹیسٹ میچز کے لیے ٹیم کا حصہ ہوں گے۔
انڈیا کا سری لنکا کا آئندہ وائٹ بال ٹور گوتم گمبھیر کا ٹیم کے نئے کوچ کے طور پر ڈیبیو بھی ہوگا۔
واضح رہے کہ اس سے قبل ٹی20 ورلڈ کپ میں ٹیم انڈیا کو فتح دلانے کے بعد راہل ڈراوڈ کے کوچ کا عہدہ چھوڑ جانے کے بعد گوتم گمبھیر نے بطور کوچ ٹیم انڈیا کو جوائن کیا تھا۔
