اسلامی تعاون تنظیم (او آئی سی) اور عرب لیگ کے مشترکہ سربراہی ہنگامی اجلاس کا اعلامیہ جاری کردیا گیا
مشترکہ اعلامئیے میں غزہ کا محاصرہ ختم، انسانی امدادکی فراہمی اور اسرائیل کو ہتھیاروں کی برآمدات روکنے کا مطالبہ کیا گیا ہے۔
Press Conference: Joint Arab Islamic Extraordinary Summit. https://t.co/8GGH9zUa5z
— OIC (@OIC_OCI) November 11, 2023
اعلامیے میں غزہ میں اسرائیلی حکومت کی جارحیت، جنگی جرائم اور غیرانسانی قتل عام کی شدید مذمت کی گئی اور اسرائیل کے حق دفاع کو غزہ میں جنگ کا جواز بنانے کو مسترد کیا گیا۔
سعودی عرب کی میزبانی میں مقبوضہ فلسطین کے علاقے غزہ کی صورتحال پر اسلامی تعاون تنظیم (او آئی سی) اور عرب لیگ کے مشترکہ سربراہی ہنگامی اجلاس ریاض میں ہوا
اجلاس میں فلسطین کے صدر محمود عباس، ترکیہ کے صدر طیب اردوان، شامی صدر بشار الاسد، ایران کے صدر ابراہیم رئیسی، امیر قطر ، وزیر اعظم پاکستان سمیت اسلامی ممالک کے سربراہان نے شرکت کی۔
فلسطین کے صدر محمود عباس نے اجلاس سے خطاب کرتے ہوئے کہا کہ اسرا ئیل غزہ میں فلسطینیوں کی نسل کشی کر رہا ہے،اسرائیلی جارح فورسز کو جنگی جرائم کی عالمی عدالت میں لایا جائے۔
سعودی ولی عہد شہزادہ محمد بن سلمان نے اپنے خطاب میں کہا کہ ہم غزہ میں جنگ کو مسترد کرتے ہیں، ہم یرغمالیوں کی رہائی کا مطالبہ کرتے ہیں، غزہ کا محاصرہ ختم اور انسانی امداد کی اجازت دی جائے۔
اردن کے شاہ عبداللہ دوم نے کہا جنگ بندی کے لئے سنجیدہ کوششوں کی ضرورت ہے، دنیا کے کسی بھی مذہب میں معصوم شہریوں کا قتل عام سنگین جرم تصور کیا جاتا ہے۔
مصر کے صدر عبدالفتاح السیسی نے کہا کہ اسرائیل کی طرف سے غزہ پر جاری بمباری کو فوری طور پر بند ہونا چاہیے، عالمی برداری کو مسئلے کے حل کے لئے سیاسی اور سفارتی کردار ادا کرنا چاہیے۔
ترکیہ کے صدر رجب طیب اردوان نے خطاب کرتے ہوئے کہا کہ دو ریاستی حل کیلئے عالمی امن کانفرنس بلائی جائے تا کہ مسئلے کا پُرامن حل تلاش کیا جائے، اسرائیل کے جوہری ہتھیار خطے کے لئے خطرہ ہیں، مسجد اقصیٰ ہمارے لیے ریڈ لائن ہے۔
امیر قطر شیخ تمیم بن حمد الثانی نے اپنے خطاب میں کہا کہ غزہ میں ہونے والے قتل عام کسی صورت قابل قبول نہیں، غزہ میں جو کچھ ہو رہا ہے تاریخ میں اس کی مثال نہیں ملتی، میڈیکل اور تعلیمی اداروں کو نشانہ بنائے جانے پر افسردہ ہیں۔
ایرانی صدر ابراہیم رئیسی کا کہنا تھا کہ غزہ کے عوام امت مسلمہ کے ہیرو ہیں، غزہ میں ہونے والی بربریت تمام عالمی قوانین کا مذاق اڑا رہی ہے، غزہ کے لوگوں کی اللہ تعالیٰ مدد کرر ہا ہے، غزہ کو دنیا کی سب سے بڑی جیل بنا دیا گیا
پاکستان کے نگران وزیرِ اعظم انوار الحق کاکڑ نے کہا کہ اسرائیل نے غزہ کو جہنم بنا دیا، 70 سال پہلے اقوام متحدہ نے اپنی منظور کردہ قرار داد کے ذریعے اس مسئلے کو حل کرنے کا فیصلہ کیا۔
