چین کے مشرقی علاقے میں ایک کیمیکل فیکٹری میں دھماکے کے نتیجے میں کم از کم 5 افراد ہلاک ہو گئے، جب کہ 6 افراد تاحال لاپتہ ہیں۔
سرکاری خبر رساں ایجنسی ’شنہوا‘ نے اطلاع دی ہے کہ یہ دھماکہ دوپہر 12 بجے کے قریب صوبہ شانڈونگ کے شہر گاؤمی میں واقع یوڈاؤ کیمیکل پلانٹ میں ہوا، جو بیجنگ سے تقریباً 450 کلومیٹر جنوب مشرق میں واقع ہے۔
بیجنگ کے اخبار ’سن جنگ باؤ‘ کی نشر کردہ ویڈیوز میں ایک بہت بڑا دھوئیں کا بادل آسمان کی طرف بلند ہوتا نظر آیا، صنعتی علاقے میں آگ بھڑکتی ہوئی دکھائی دی اور کئی دکانوں کی کھڑکیاں دھماکے کی شدت سے ٹوٹ گئیں.
Massive explosion rocked the Shandong Youdao Chemical plant in Gaomi, China today.
The blast sent fireballs and thick smoke into the sky, shattering windows kilometers away.
The plant is the world’s largest chlorpyrifos producer. pic.twitter.com/OL0D0906vz
— Clash Report (@clashreport) May 27, 2025
شنہوا کے مطابق مقامی حکام نے بتایا ہے کہ حادثے میں 5 افراد ہلاک، 6 لاپتا اور 19 معمولی زخمی ہوئے ہیں۔
ویڈیوز میں ایک سڑک پر بکھرا ملبہ، ایک گاڑی کی ٹوٹی ونڈ اسکرین اور پس منظر میں گہرے نارنجی شعلے تنصیبات کو نگلتے ہوئے دکھائی دے رہے تھے۔
وزارت ایمرجنسی مینجمنٹ کے بیان کے مطابق ہنگامی امدادی اداروں نے جائے وقوع پر 55 گاڑیاں اور 232 امدادی کارکن روانہ کیے۔
یوڈاؤ کیمیکل کم زہریلی کیڑے مار ادویات تیار کرتی ہے جبکہ 47 ہیکٹر (116 ایکڑ) پر محیط اس فیکٹری میں تقریباً 300 افراد ملازمت کرتے ہیں۔
