بھارت کے مالیاتی دارالحکومت ممبئی میں اسٹینڈ اپ کامیڈین کنال کامرا کی جانب سے اسٹیج سے شہر کے معروف سیاستدانوں میں سے ایک کا مذاق اڑانے پر ہجوم نے کلب میں توڑ پھوڑ کی۔
رپورٹ کے مطابق بھارت کے معروف کامیڈین کنال کامرا نے ممبئی میں پرفارمنس کے دوران ایک پیروڈی گانا گایاجس میں ریاستی حکومت کی دوسری اہم ترین شخصیت ایکناتھ شندے کو ’غدار‘ سے تشطیہ دی گئی تھی۔
شو ختم ہونے کے فوراً بعد ایکناتھ شندے کی شیو سینا پارٹی کے حامیوں نے ’دی ہیبی ٹیٹ‘ کامیڈی مقام پر دھاوا بول دیا اور تباہی مچا دی۔
سوشل میڈیا پر بڑے پیمانے پر شیئر ہونے والی فوٹیج میں درجنوں افراد کو کرسیاں پھینکتے، لائٹ فٹنگز کو توڑتے اور دیوار پر لگی پینٹنگز کو توڑتے ہوئے دکھایا گیا ہے۔
پولیس کے مطابق کلب میں توڑ پھوڑ کے سلسلے میں کم از کم 20 افراد کی تلاش کی جا رہی ہے۔
دی ہیبی ٹیٹ نے سوشل میڈیا پوسٹ میں کہا کہ وہ اس وقت تک اپنے دروازے بند کر رہا ہے جب تک کہ وہ مقام کو ’خطرے میں ڈالے بغیر آزادی اظہار کے لیے پلیٹ فارم فراہم کرنے کا بہترین طریقے‘ کا تعین نہیں کر لیتا۔
ریاست مہاراشٹرا کے وزیر اعلی اور ایکناتھ شندے کے باس دیویندر فڈنویس نے کہا کہ کامیڈین کو ’معافی مانگنی چاہیے‘ اور یہ کہ ’رہنماؤں کی توہین برداشت نہیں کی جا سکتی۔‘
’غدار‘ تبصرہ ایکناتھ شندے کے 2022 میں اپنی سیاسی وفاداری کو تبدیل کرنے کے فیصلے کا حوالہ تھا، جس نے ریاست میں ایک ہفتہ طویل سیاسی بحران کو جنم دیا جس نے اس وقت کے وزیر اعلیٰ کو استعفیٰ دینے پر مجبور کردیا تھا۔
