نائیجیریا میں کشتی الٹنے سے 100 سے زائد افراد لاپتہ، متعدد ہلاکتوں کا خدشہ

نائیجیرا میں کشتی ڈوبنے کے بعد کشتی میں سوار 300 افراد میں سے 100 لاپتہ ہوگئے۔

کشتی نائیجیریا کے ضلع موقوا کے مقام پر دریائے نائیجر میں ڈوبی جس کے بعد سے اب تک 100 افراد لاپتہ ہیں۔

رپورٹ کے مطابق کشتی مقامی طور پر لکڑی سے تیار کی گئی تھی جس میں 100 لوگوں کے سفر کرنے کی گنجائش تھی مگر جب کشتی روانہ ہوئی تو اس پر 300 لوگ سوار تھے جن میں اکثریت خواتین اور بچوں کی تھی۔

حادثہ اس وقت پیش آیا جب کشتی میں سوار افراد ایک مذہبی تہوار مکمل ہونے کے بعد واپس جارہے تھے۔

حادثے کی اطلاع ملنے کے بعد مقامی حکام نے 150 افراد کو ریسکیو بھی کیا لیکن100 افراد تاحال لاپتہ ہیں۔

لوکل کونسل کے ایک رہنما نے 60 افراد کی لاشیں ملنے کا دعویٰ کیا ہے۔