متحدہ عرب امارات نے امریکہ پر واضح کرتے ہوئے کہا ہے کہ وہ فلسطینیوں کو بے گھر کرنے کی کسی بھی کوشش کو مسترد کرتاہے۔
امریکی وزیرِ خارجہ مارکو روبیو نے بدھ کو ابوظہبی کا دورہ کیا جہاں انہوں نے یو اے ای کے صدر سے ملاقات کی۔
یو اے ای کے صدر شیخ محمد بن زاید النہیان نے امریکہ کے وزیرِ خارجہ مارکو روبیو کو بتایا ہے کہ امارات “فلسطینیوں کو ان کی زمین سے بے گھر کرنے کی کسی بھی کوشش” کو مسترد کرتا ہے۔
شیخ زاید نے اس بات پر زور دیا کہ غزہ تنازع کو پھیلنے سے روکنے کی ضرورت ہے۔
یو اے ای کے صدر نے غزہ کی تعمیرِ نو کے لیے ایسا راستہ اپنانے کی اہمیت پر زور دیا جو دو ریاستی حل پر مبنی جامع اور پائیدار امن کی طرف لے جائے۔ ان کے بقول خطے میں استحکام یقینی بنانے کا یہ واحد طریقہ ہے۔
مارکو روبیو کی اماراتی صدر سے ملاقات ان کے اُس کثیر الملکی دورے کا حصہ تھی جس میں انہوں نے اسرائیل اور سعودی عرب کے رہنماؤں سے بھی ملاقات کی تھی۔
یہ دورہ ایسے وقت میں ہوا ہے جب غزہ کی پٹی میں اسرائیل اور فلسطینی عسکریت پسند تنظیم حماس کے درمیان 19 جنوری سے شروع ہونے والی جنگ بندی کا پہلا مرحلہ مکمل ہونے کے قریب ہے۔
واضح رہے کہ امریکہ کے صدر ڈونلڈ ٹرمپ نے فلسطینیوں کو غزہ سے خطے میں کہیں اور منتقل کرنے اور امریکہ کی جانب سے غزہ کا کنٹرول سنبھالنے اور تعمیرِ نو کرنے کا منصوبہ پیش کیا تھا جسے عرب رہنماؤں نے مسترد کردیا ہے۔
